Thursday, November 16, 2017

“மிஷ்கினைத் துப்பறிவோம்”: எதிர்வினைகள்

 Image result for mysskin

இம்மாத உயிர்மையில் வெளியாகியுள்ள எனது கட்டுரை ”மிஷ்கினை துப்பறிவோம்”. அதற்கு உற்சாகமான ஆர்வமுட்டும் எதிர்வினைகள் தொடர்ந்து வருகின்றன. இதழ் வெளியான அன்றே நண்பரும் எழுத்தாளரும் நடிகருமான ஷாஜி என்னை போனில் அழைத்து நீண்ட நேரம் பேசினார். அவர் மிகுந்த உணர்ச்சிகரமான நிலையில் இருந்தார். “மிஷ்கினை நீண்ட காலம் கூட இருந்து அறிந்த ஒருவர் எழுதுகிற விசயத்தை எப்படி அவரை ஒரே ஒருமுறை மட்டுமே சந்தித்த நீங்கள் எழுதினீர்கள்?” என்ற கேள்வியை திரும்பத் திரும்ப கேட்டார். அவரது வியப்பு எனக்கு மேலும் வியப்பாக இருந்தது. அந்தளவுக்கு சிறப்பாகவா எழுதியிருக்கிறேன்? மிஷ்கினின் ஆளுமையைப் பற்றின எனது ஒரு எளிய அவதானிப்பாகவே அதைக் கருதி இருந்தேன். ஒருவிதத்தில் சமீபத்தில் சாருவைப் பற்றி நான் எழுதியதன் நீட்சி தான் இது.
Image result for ஷாஜி

 எப்படியோ ஷாஜிக்கு பிடித்திருந்தது எனக்கு மிகுந்த உவகையும் திருப்தியும் அளித்தது. அவர் கூர்மையான மனிதர். ஆழமான வாசகர். அவருக்கு சரியாகப் பட்டதென்றால் நான் ஒரு நல்ல கட்டுரையைத் தான் எழுதியிருக்கிறேன் எனப் பொருள்! இக்கட்டுரையைப் பற்றி மிஷிகினிடம் அவர் பேசினதாகவும், இதை அவர் மிஷ்கின் வாசிக்கும் பொருட்டு அனுப்பித் தரப் போவதாகவும் சொன்னார். ஷாஜி “துப்பறிவாளன்” படம் பற்றி பல அற்புதமான விசயங்களை என்னிடம் அன்றிரவு பகிர்ந்து கொண்டார். அதையெல்லாம் கேட்டிருந்தது ஒரு அபாரமான அனுபவம்.

ஷாஜியுடனான உரையாடலைத் தொடர்ந்து இந்த மின்னஞ்சல்கள் வந்தது பின்னிருந்து அணைத்து காதலி அளிக்கும் முத்தங்கள் போல் இருந்தன. யமுனைச்செல்வனுக்கும் விஜயகுமாருக்கும் நன்றிகள்! என்னைப் போன்ற ஒரு எளிய எழுத்தாளன் வேறென்ன எதிர்பார்க்க முடியும்? இது போன்ற எதிர்வினைகள் தாம் என்னைத் தொடர்ந்து பித்துப் பிடித்தது போல் எழுதச் செய்கின்றன.

 தொடர்ந்து என்னை இது போல் நேசியுங்கள்!

வணக்கம் அபிலாஷ்.

மிஷ்கினை துப்பறிவோம் கட்டுரை வாசித்தேன்படைப்புகளைக்கொண்டு படைப்பாளனை அணுகுவதில் எனக்கு உடன்பாடில்லை எனினும்கட்டுரை அருமைஒரே ஒரு குறை.. கட்டுரை இன்னும் விரிவாக இருந்திருக்கலாம் என்பதேஉள்ளடக்கத்தைச் சொல்லவில்லைஒருவேளை எடிட்டிங்கில் சுருக்கப்பட்டிருக்கலாம்இதுபோன்ற கட்டுரைகளை ஆங்கிலத்திலும் நீங்கள் எழுதவேண்டும்.


நன்றி
யமுனைச்செல்வன்

அன்புள்ள அபிலாஷ் அவர்களுக்கு ,

வணக்கம் .
உயிர்மை நவம்பர் கட்டுரையை ஒரே மூச்சில் படித்தேன். நீங்கள் உளவியல் சார்ந்து எழுதும் கட்டுரைகள் வாசிக்க அதிசுவாரஸ்யமாக உள்ளன; பெண்ணுடல் குறித்தும் கோபிகிருஷ்ணன் குறித்தும் நீங்கள் முன்னர் எழுதிய, பேசியவை நினைவுக்கு வருகின்றன. உங்களின் இதைப்போன்ற பொது உளவியல் கட்டுரைகள் தொகுக்கப்பட்டு வெளிவரவேண்டும் என விரும்புகிறேன்.


மைக்கேல் ஹென்கேவின் Amour என்ற பிரெஞ்சு படத்தை நேரமிருப்பின் நீங்கள் பார்க்கவேண்டும். அந்தப் படத்திற்கும் கட்டுரைக்கும் தொடர்புண்டு. இது குற்றம் பார்த்தல் அல்ல; மிஷ்கினை எனக்கு மிகவும் பிடிக்கும். நாம் அறிந்த ஒன்றை நமக்குப் பிடித்த ஒருவர் சொல்வதால் வரும் இன்பம்.


The confessions of a mask எழுதிய மிஷிமா தற்கொலை செய்துகொண்டார். அந்த சாமுராய்களின் தற்கொலை முறைக்காட்சியும் படத்தில் இருந்தது. அப்போதும் உணர்ச்சி மிகுந்த ஒரு நிலைக்குச் சென்றேன். இவ்வாறாக இரண்டுமுறை.

முன்னமே அறிந்து அதைக் காண்பதால் வரும் இன்பம், அறிதலால் வரும் இன்பம்.
அது நாம் கைகோர்க்கும் புள்ளி அல்லவா?!

நன்றி.

அன்பொடு
விஜயகுமார் .


Tuesday, November 14, 2017

என்னாச்சு?


நண்பர் ஆஸாத் ஒரு மின்னஞ்சல் அனுப்பிக் கேட்டிருந்தார்: “உடம்புக்கு ஒன்றுமில்லையே?” நான் பிளாகை அப்டேட் செய்து ரெண்டு வாரம் ஆகிறது. அதனால் தான்.

எங்க கடை பொருளை வாங்காதீங்க ப்ளீஸ்! (2)

தொழில் புரட்சியும் அந்நியமாதல் இருபதாம் நூற்றாண்டில் ஐரோப்பாவில் துவங்கியது என்றாலும் இந்தியாவை ஒரு புயலாக அது தாக்குவது இப்போது தான்.
“மாடர்ன் டைம்ஸில்” பிரசித்தியான காட்சி அசெம்பிளி லைன் எந்திரத்தில் சாப்ளின் மாட்டிக் கொண்டு ஒரு பொருளைப் போல எந்திரத்தால் பல பகுதிகளுக்கும் எடுத்துச் செல்லப் படுவதும், அவர் இறுதியில் அதில் இருந்து வெளியேறுவதும். அதைப் பார்த்தால் வயிறு வலிக்க சிரிப்பீர்கள். அபாரமான அந்நியமாதல் சித்தரிப்பு அது.

எங்க கடை பொருளை வாங்காதீங்க ப்ளீஸ்! (1)


Image result for chaplin modern times

சாப்ளினின் “மாடர்ன் டைம்ஸ்” தொழிற் புரட்சி உச்சம் பெற்ற காலத்தைப் பற்றின ஒரு பகடி.
வேலையில்லாமல் தவிக்கும் ஆயிரக்கணக்கான மக்கள்; தொழிற்சாலை முகப்பில் கூட்டமாய் சூழ்ந்து நின்று வேலைக்காய் இறைஞ்சும் மக்கள்; எந்த வேலை செய்யவும் தயாராக உள்ள மக்கள். இம்மக்களை தொழிற்சாலைகள் கச்சாப்பொருளைப் போன்று நடத்துகின்றன. யாருக்கும் எந்த தனித்திறனும் தேவையில்லை. யாரும் எந்த வேலையும் செய்யலாம்.

Tuesday, October 31, 2017

ஒரு சொல்லில் உள்ளது கவிதை

இன்று அதிகாலை நடையில்
முதன்முதலாக சந்தித்தோம்
நானும் ஒரு பனித்துளியும்
ஒரு வாழ்நாள் முழுவதும்
பேசிக் கொண்டிருந்து விட்டு
பரஸ்பரம் காணாமல் போனோம்!
- எம். யுவன்

# "போனோம்" என்பதில் உள்ளது இது கவிதையாகும் மாயம்.

மேலாண்மை பொன்னுசாமி விடைபெற்றார்


மேலாண்மை பொன்னுசாமியை நான் என் 13ஆம் வயதில் படிக்க ஆரம்பித்தேன். அவர் கதைகளின் உக்கிரம், முறுக்கு, நேரடியாய் கோபத்தை உரக்க சொல்லும் பாணி பிடித்திருந்தது. சிலரைப் படிக்கையில் இந்த ஆள் பொய் சொல்லவில்லை எனத் தோன்றும். மேலாண்மை அப்படியானவர்.

அவரை பின்னர் புதிய தலைமுறை டிவி நிகழ்ச்சி ஒன்றில் சந்தித்தேன். அதே நேர்மையுடன், பாசாங்கற்ற நேர்மையுடன், சமூக பொறுப்புணர்வுடன் பேசினார். சற்றே உடல் நலிவுற்றிருந்தார் அப்போது. ஆனால் அது குறித்த தன்னிரக்கமோ கவலையோ அற்ற மனிதனாய் தெரிந்தார்.

ஜெயமோகன் சொல்வது போல் அவர் மிக ஸ்நேகமான மனிதர். கடல் அலையைப் போல் நம்மை அவராகவே வந்து தொட்டணைத்துக் கொள்வார். அவருடன் பழகக் கிடைத்த அந்த நிமிடங்கள் மறக்க முடியாதவை. அவரது மென்மையை, சுபாவ இனிமையை பொறுத்த மட்டில் நிச்சயம் வண்ணதாசனுடன் அவரை ஒப்பிடலாம். அவரது அரசியல் உறுதியும் பிடிப்பும் அசையாத நம்பிக்கையும் பொன்னீலன், ஹெச்.ஜி ரசூல், ஹமீம் முஸ்தபா போன்ற மார்க்ஸிய நண்பர்கள், எழுத்தாளர்களை எனக்கு நினைவுபடுத்தும். இனிவரும் தலைமுறையும் அவர் எழுத்தைப் படிக்கும் என்பதில் ஐயமில்லை. அவர்கள் வழி அவர் வாழ்வார்!
ஆழ்ந்த இரங்கல்!

Wednesday, October 25, 2017

ஜோசப் விஜய்யும் நிஜ விஜய்யும்: எச். ராஜாவின் முட்டாள் வியூகங்கள்

 Image result for h raja

அரசியல் என்பது மக்களின் உணர்ச்சிகளைத் தூண்டி அவர்களை ஒன்று திரட்டுவது தான். ஆனால் அதை செய்ய நீங்கள் மக்களுக்கு நெருக்கமாய் நின்று அவர்களை ஆழமாய் பாதிக்கும் உணர்ச்சிகள் என்ன என தெரிந்து வைத்திருக்க வேண்டும். ஆனால் எச்.ராஜா உள்ளிட்ட பா.ஜ.க தலைவர்களுக்கு இந்த எளிய சூத்திரம் புரியவில்லை. அவர்கள் திரும்பத் திரும்ப தம்மை கோமாளியாக்கிக் கொள்கிறார்கள்.
 விஜய் ஒரு கிறித்துவர் என எச்.ராஜா வெளிச்சம் போட்டுக் காட்ட வேண்டியதில்லை. தன் பெயர் ஜோசப் தான் என்பதை அவரே துணிச்சலாய் சொல்வார். தன் லெட்டர் பேடில் அப்பெயருடன் தான் அவர் குமுதத்துக்கு நன்றிக் கடிதம் அனுப்புகிறார். அவரது தாய் இதைப் பற்றி முன்பு ஒரு பத்திரிகைத் தொடரில் எழுதியுள்ளார். விஜய்யின் தாய் இந்து. அப்பா கிறித்துவர். விஜய் கிறித்துவராகவே வளர்ந்துள்ளார். இது தமிழர்களுக்கு ஒரு பிரச்சனையே இல்லை என்பது எச்.ராஜாவுக்கு புரியவில்லை என்பது தான் பிரச்சனையே.

Sunday, October 22, 2017

மெர்சல் சர்ச்சை: ஒரு திட்டமிட்ட நாடகம்

 Image result for mersal
மெர்சல் பட வசனத்தை பா.ஜ.வினர் கண்டித்ததில் துவங்கிய சர்ச்சையும், அதனை ஒட்டி அப்படத்துக்கு ராகுல் காந்தி, ஸ்டாலின், சினிமா பிரபலங்கள் சிலர் துவங்கி தமிழ் உள்ளூர் முகநூல் விமர்சகர்கள் வரை தெரிவித்த ஆதரவைக் காண்கையில் இந்த கேள்வி மட்டுமே எனக்கு எழுகிறது: ஒரு திட்டமிட்ட அரசியல் நாடகத்தில் அவசியமின்றி ஏன் பலரும் எண்டர் ஆகி எழுதப்படாத வசனங்களைப் பேசி வேறு யாருக்கோ கைத்தட்டல்கள் போவதை உணராமல் புல்லரிக்கிறார்கள்?
இந்த சர்ச்சையின் நோக்கம் என்ன? (ஆம், எந்த ஊடக சர்ச்சையும், அதுவும் அரசியல்வாதிகள் சம்மந்தப்பட்ட எந்த சர்ச்சையும், தாமாக ஏற்படுவதில்லை.